Günter Bächles Weblog

Heidanei, da lacht er wieder, Mühlackers OB. Er macht sei Lieblingsg'schäft: Model steha für a Bild en d'r Zeitong. Denn des isch für ihn des Wichtigschte, moint er: En Pressetermin, wo m'r fotografiert wird, damit d'Leit wissa, dass m'r emmer no so aussieht, wie d'Leit oin kenna. On wer sieht, wie er strahlt, denkt tatsächlich, der OB sei scho emmer für d'Förderong der neia Orgel von d'r Pauluskirch' en Mühlacker durch d'Schtadt g'wää. Hasch denkt! Vor Monata hat d'r Orgelförderveroi scho a moal oaklopf beim OB und om a Spenda oder en genschtigschte Kredit gebeta. "Noi" hat'r gsagt on des dem Veroi schriftlich geba. Doch der Veroi isch zu de Fraktiona em Gmoiderat ganga. CDU und SPD hen en Oatrag gschtellt, die andere waret au dafier und deshalb gibt's doch en zensloses Darleha von d'Stadt, dass die Orgel gleich zahlt werra kann. Überbrückungshilf' nennt m'r des für en Veroi, der scho viel Geld g'sammelt hat für die Orgel und der weiter sammelt, dass d'Stadt ihr Geld widder zrick kriagt. Weil d'Gmoiderat gholfa hat, strahlet diea Herra neba dem OB au so. Des senn uff dem Bild en d'Pforzheimer on in d'r Vaihinger Zeitong der evangelische Dekan on der Vorsitzende vom Orgelförderveroi. Dia wisset aber g'nau, wer dafür g'sorgt hat, dass se lacha kenna!